Ne that so many men to dethe wente [folio 202b]
Line 13701
As did ther, or the batayle ente;—
Ne neuere of sege that so longe lay,
Ne neuere schal to domysday;—
Line 13704
Ne men that myght so longe endure
To fight euery day In her Armure
With-oute reste and with-oute sese,
That thei toke neuere trewe ne pese.
Line 13708
¶ Ne held thei not sumtyme assaut,
Day be day to-gedur thei faut,
That thei rest neuere ful doughtyly
A ful monethe contynuely.
Line 13712
But men may se ther-by that can,
What strengthe & myȝt ther hadde a man;
¶ For now lyues nother man ne knyȝt
That if thei were put to that fyȝt,
Line 13716
That thei ne scholde be for-done,
Long tyme or it were none;
And thei be-gan at sonne rysyng.
But that liggis not In my spekyng,
Line 13720
I wol speke ther-of no more,
But turne a-ȝeyn ther I was ore.
THe stoure haue thei of Troye be-gonne,
And thei of Grece ben to hem ronne
Line 13724
And made In her armure many a brek,
Many a man lay slawe ded sterk.
A riche kyng was called Philomene,
A worthi knyȝt, a kynde Troiene,
Line 13728
And also sir Palidomas,—
Thei two to-gedir met kyng Thoas:
¶ Thei layd vpon him bothe at ones,
Thei brosed his flesch and eke his bones;
Line 13732
His myght vayled him not of two lekes,
Thei toke him maugre his chekes.
