¶ Hic Achilles occidit Ectorem.
¶ Ector was thanne faste a-boute [folio 161b]
Line 10911
Off that prece to haue him oute [MS. sute.] ;
Line 10912
But men stode so on euery a side,
That he myȝt not out with him ride:
To haue him out was he not ethe,
He put his swerd In his schethe,
Line 10916
He kest his scheld on his bak,
To saue the kyng fro alle his pak;
To other ȝaf he no tent,
But he were with-oute, as he hadde ment.
Line 10920
AChilles held him euere a-rome,
And saw that Ector ȝaff no gome
To no man thenne but for to bryng
Out of that prece that riche kyng:
Line 10924
He hadde that tyme no spere In hand
Ther-with to dere no man lyuand,
His swerd was put In his skauberke,
He was al bare but his hauberke
Line 10928
On his brest & his stomak,
His scheld was casten on his bak.
¶ Achilles ther-to toke good hede
And thoght, "but he that tyme spede,
Line 10932
That he scholde neuere to dethe him do,
But he myȝt that tyme come ther-to."
He stroke his stede & helde him faste,
And to[k] his spere that wel wolde laste,
Line 10936
And rod to him, er he were war,
And thorow the bodi he him bar:
¶ Thorow the bodi he him thrist,
Er he were war & er he wyst;
Line 10940
He bar him doun vpon the grounde
Fro his hors with dethes wounde.
ODemon saw Ector was dede,
He saw his blod aboute sprede;
Line 10944
