To speke with him, her erand to schewe,— [folio 120a]
Off his consayl were ther but fewe.
Line 8090
¶ Delon broght hem to the bordis,
Thei gret the kyng with louely wordis,
Line 8092
Thei told her erand and asked respit:
"That alle myȝt reste, bothe knaue & knyȝt,
On bothe parties monthes thre
By siker hostage & gode surte."
Line 8096
With louely wordes and faire spekynges
Kyng Priamus answered the kynges:
¶ 'I holde him certes with-oute manhede,
That loueth wrong or any falshede;
Line 8100
I dar of trewe make myn avaunt:
I schal helde siker that I graunt,
I schal holde trewes I vndirtake;
I schal hem helde and siker make,
Line 8104
That non of myne schal do ȝow skathe,
Nother late, erly, ne rathe
Lastyng the trewe; and ȝe also
The same a-ȝeyn to me schal ȝe do.
Line 8108
¶ But ȝe wot wel: It is not skylle,
That I assente the trewes tille
With-oute red of my consayle,
Off my baronage, & myn avayle
Line 8112
That ar with me In myn enprise.
But I for ȝow now schal arise
And herkyn, what my consayl sais;
So longe ȝe schal dwelle In peis.
Line 8116
Iff thei assent, I graunt for me:
What thei wol say, ȝe schal sone se.'
PRiamus wol no lengur ete,
He settis a-way drynke & mete,
Line 8120
For curtasie of his two gestis
He settis a-way borde and trestis.
