Thorow-out his Armure gert he it flye; [folio 76a]
Line 5095
Then thei of Troye be-gan to crye,
Line 5096
To held Ector he cried and grad
For that [MS. For In that.] perel that he was In stad.
¶ When Senabor, his brother, herde
That Ector thus In batayle ferde,
Line 5100
He hied faste In al his myght
With al his ost In-to that fyght;
Thorow hem alle he to hem presed
And of that perel him relesed.
Line 5104
Off his strong men that were myghti
At his comyng were sclayn thritti,
Off hem that hadde him vmbecast
Thritti were ded, er thei past.
Line 5108
¶ Then delt Ector dyntes a-riȝt,
Alle ȝede to dethe that come in his sight;
He wolde not longe dwelle In here dette,
He sclow doun right alle that he mette.
Line 5112
Alle ȝede to dethe afftir that tyde,
That were so bold his strok to abyde;
He was with Ire so chaufed and het,
His armes were al blod & al wet;
Line 5116
He dalte aboute him large lyuere,
Of his strokes was he so fre,
That alle toke part that come him ner,
Erle, duke, knyȝt, & sqwyer.
Line 5120
¶ Many a riche amerayle
Broght he that day to wrotherhayle
And al his dole, many a knyght
Toke her dethe with-oute respit.
Line 5124
He fond no man wel many sithe,
On wham he myȝt his wratthe kythe.
TRoyle was on that other syde
And ȝaf the Gregeis woundes wyde,
Line 5128
