¶ Hic Greci congregati sunt.
Herkenes now, both grete and smale! [folio 49b]
Line 3293
For now be-gynnes al this tale:
How thei dede, and how thei faught,
And what and how ther dethe thei caught.
Line 3296
HIt was a day off Feuerer,
That kynges, dukes, and Mariner
With here naue vpon a res
Were Gadered alle to Athenes,
Line 3300
With honour forth right
With Priamus and hese to fyght.
So fele knyghtes of gret renoun,
Ne so fele kynges corouned with croun,
Line 3304
Were neuere ȝit at on semble,
Off on purpos, ne neuere schal be;
Ne so fele schippis In on hauen,
Ne so fele with swordes and stauen,
Line 3308
Was neuere sene for-sothe ne herde,
Sithen god made man first In this worlde.
¶ Dares telles in His scripture
Off eche a kyng and his stature,
Line 3312
And here names and her makyng,
And discreues hem in alle thyng,
And the nombre that euery kyng broght,
And the wondres that thei wroght;
Line 3316
Gret tariyng it is to telle
That Dares makes vpon his spelle.
But sicurly with-oute lesyng:
Sithen that god made al thyng,
Line 3320
Suche a peple was neuere y-sene—
Off alle the tyme that hath bene—
To-geder broght at o samyng
Off kynges and knyghtes old and ȝyng,
Line 3324
And so fele schippis on o fflete,
Sethen shippus ȝede with sail or sprete.
