(14)
¶ Eche a kyng haþ goddis power,
Of lyf and leme to saue and spille.
He muste make god his partener,
And do not his owen wille.
Line 108
For god resceyueþ eche pore mannys bille,
And of here playnt, god hereþ þe sowne.
Sette ȝoure in euene skille,
Counseile þe kyng to kepe þe crowne.
Line 112
(15)
¶ The fadir, þe wanton child wole kenne,
Chastyse wiþ ȝerde, and bete hit sore.
So after, þe fadyr þe ȝerde wole brenne,
When child is wys, and takeþ to lore.
Line 116
We han ben goddis ȝerde ȝore,
Chastysed kyngdom, castell, and towne.
Twyggis of oure ȝerde we haue forlore.
God saue þe kyng, and kepe þe crowne!
Line 120
(16)
¶ Englische men dede maystryȝes make;
Þurgh all þe world, here word it sprong.
Cristen and heþen þey mad to quake,
Tok and slowen kynges strong.
Line 124
God let neuere werre be vs among,
To lese þat blo of gret renowne,
Ne neuere oure riȝt be turned to wrong.
God saue þe kyng, and kepe þe crowne!
Line 128
(17)
¶ Among oure self, ȝif fiȝt be raysed,
Þan stroye we oure awen nest.
Þat haþ victor, wole be euel payed,
So many good men ben lest.
Line 132
Ȝit is beter bowe þan brest. [[MS. berst]]
Eche man is bounden to resoun.
Ȝe þat ben wysest, take þe best;
Conseile þe kyng, mayntene þe crowne!
Line 136
