(6)
¶ Ȝif sercle, and floures, and riche stones,
Were eche a pece fro oþer flet;
Were þe crowne broken ones,
Hit were ful hard aȝen to knet.
Line 44
Auyse ȝow er ȝe suffre þat fit;
Amende, ȝe þat mende mown!
Ȝe þat ben wysest, cast ȝoure wyt;
Stonde wiþ þe kyng to kepe þe crowne.
Line 48
(7)
¶ To kepe þe crowne, god graunte ȝow grace,
And let it neuere be to-broken;
For word of wynd lityl trespase;
Non harm nys don, þouȝ word be spoken.
Line 52
Let wysdom be vnloken,
Apert and preuyly to rowne.
For non euyll wille no man be wroken,
But stonde wiþ riȝt, mayntene þe crowne.
Line 56
(8)
¶ A man myȝte be forborn
Fer fro a kynges place,
Wolde make a kyng to be forsworn
To lette þe lawe, it most not passe,
Line 60
And make hym wene þat he grace,
And holy in condicioun,
And mayntene hym in his trespace,
While he pykeþ þe stones out of þe crowne.
Line 64
(9)
¶ A kyngdom must be gouerned by riȝt,
To chastyse false þat ar aspyed.
Falsed and trouþe to-gydre wole fiȝt,
Til oon þat oþer haþ distroyd;
Line 68
Til trouþe be fro treson tryed,
Shal neuere be pes in regyon.
In all kyngdomes þat man haþ gyed,
To þe place of vertues, god geueþ þe crowne.
Line 72
