(7)
¶ Thy wikked werkis in þy ȝowthe,
Seke hem wel tyll þou hem fynde,
And al þy tyme riȝt til nowþe;
Loke þat fardel þou vnbynde,
Line 52
And shewe it wel wiþ shrift wynde;
No fende spot vppon the spyȝe;
And haue repentaunce in mynde.
On þis manere lerne to dyȝe.
Line 56
(8)
¶ While man doþ synne in werkis wylde,
Al þat tyme he nys but ded;
He nys not counted as fool ne childe,
But as a man can good and qued.
Line 60
ffor his soule he telyeþ no bred;
Here landis of vertue laye don lyȝe.
Do comaundementis þat god bed,
Þan lernest þou wysely to dyȝe.
Line 64
(9)
¶ Pore, nedy, and gredy, þat not ne haue,
In goddis name ȝeue þat asken ouȝt.
Pore, nedy, and not gredy, þat noȝt ne craue,
Ȝeue hem þouȝ þey ne aske nouȝt.
Line 68
And nedeles gredy þyn almes souȝt,
Ȝeue hem no þyng þouȝ þey crye:
Þere nys no nede, ȝifte haþ no mede.
Suche almesdede mon neuere dye.
Line 72
(10)
¶ What argument may beter preue
Why men ben bent to don o mys?
Not but defaute of byleue.
I trowe þey wene no god þer nys,
Line 76
Ne helle pyne ne heuene blys,
Paradis ne purgatorie,
Or elles, a-noþer heresy þere is,
As a best wiþoute soule to die.
Line 80
