(3)
¶ Eche man in certayn is to dye,
At domesday stonde in drede.
Þere al þe worldis tresorye
May not bye [folio 105a] thy lyf for mede,
Line 20
No wys counseil þat dede þe lede,
Ne glosere wiþ his flaterye;
Non may helpe oþer at nede:
ffor thy, man, wysely lerne to dye.
Line 24
(4)
¶ What may thy richesse þe auayle [[nota]]
Whan þou art to deþe dryue?
Thy wynd is layd, þou mayst not sayle,
Þouȝ þou lete out bonet and ryue.
Line 28
Loke to vertues þou þe ȝyue
Er tombe be held to þe liȝe;
ffor he þat gostly wel doþ lyue,
He lerneþ wysely for to diȝe.
Line 32
(5)
¶ Two skilles y wole telle
Why eche man shuld repreue oþeres synne:
And he wyst hym self shuld go to helle,
Counseyle no mo to come þer-ynne:
Line 36
Þe mo brondes, þe hattere brynne,
Incresyng of his maladye;
Here nys no charite, ȝut shal he wynne
To lasse his pyne after he dye.
Line 40
(6)
¶ And ȝif he wiste to heuene to go,
His soule be saued in sikirnes,
He shulde counseile all folk do so,
Saue here soules, and do not mys;
Line 44
Nouȝt for here profyt, but al for his,
His owen ioye for to hyȝe;
Þe mo soules, þe more blis.
Þenk here-on, and lerne to dyȝe.
Line 48
