(6)
¶ That ouer puple han gouernaunce,
Loke how goddis lawe ȝe vse;
Whom ȝe refuse, and whiche auaunce,
ffor goddis loue, or ȝoure owen seruyce,
Line 44
Whiche is þe charge ȝow auyse.
Let eche man serue his charge in skylle,
And ȝoure werkis preue ȝow wyse.
Let wit be lord aboue thy wylle.
Line 48
(7)
¶ Be not to crowele in þy wele,
Þou nost how sone þou myȝt haue lesse.
Be not to sykere of þyne hele,
Þou not how sone falle in sykenesse.
Line 52
Deþ claymeþ eche man for hesse,
And sodeyn, deþ no dayes selle.
Siþ no man is in sykernesse,
Be redy euere at goddis wille.
Line 56
(8)
¶ And on þy strengþe be not to bold,
Ne skorne no pore, ne feble of elde.
ffor lyue longe ȝe mon be old,
In feblenes to hoke and helde,
Line 60
In cowardys ȝoure corage kelde.
But ȝe had help, ȝe shuld spille.
Ȝe þat heuene blisse wole welde,
Let wit be lord aboue ȝoure wille.
Line 64
(9)
¶ God haþ lent ȝow discrecioun
Boþe of wele and of woo,
Werkis of deuocioun,
Vyces, vertues, frend, and foo.
Line 68
Siþ ȝe can part hem wel o two,
Let vyces on ȝow brynge no bille.
Þe weye of grace, and ȝe wol go,
Let wyt be lord aboue ȝoure wille.
Line 72
