(2)
¶ Who so wist, what tresoure
He haþ þat worcheþ by wit;
Þe fader of heuene is gouernoure,
Þe holigost, þe sone wiþ hit.
Line 12
In oo godhede alle þre are knyt,
Non departe fro oþer nylle;
In eche mannys herte, alle þre þey syt,
Þat makeþ wit lord aboue his wille.
Line 16
(3)
¶ Who so wyste what wille harmes,
Þat willefully fro wyt wendes;
ffro þe fader of heuene his soule he charmes,
ffro grace of þe holygost hym blendes,
Line 20
ffro angels pere, soget to fendes,
Þat nyl not mende, but ay don ylle.
Gostely and bodily hym self he shendes,
Þat leueþ wyt, and worcheþ by wille.
Line 24
(4)
¶ In kyngdom, what makeþ debate,
Riche and pore both anoyȝed?
Ȝong counseil, and preuey hate,
And syngulere profit ys aspiȝed,
Line 28
Hiȝe and lowe men abyȝed;
Echon wayte oþer for to kille.
Þat kyngdom mot nede be striȝed,
That leueþ wit, and worcheþ by wille.
Line 32
(5)
¶ That leueþ trouþe, and falshed vse,
And [folio 104a] lyue not after goddis sawe,
Suche folk god doþ despuse,
Rebell and ryse aȝen his lawe.
Line 36
Þo puple that stondes of god non awe,
But robbe and reue, coffres to fylle:
Þe swerd of vengeaunce on hem is drawe,
Þat leueþ wit, and worcheþ by wille.
Line 40
