He is wys, that can do so,
And wel twynnen hem o tway.
In sykernes may he go,
And recche neuere what men say.
Line 72
(10)
¶ Gloseres maken mony lesynges—
Al to sone men hem leue [MS. leues] —
Boþe to lordys and to kynges,
Þat boþe partye ofte greue. [MS. greues]
Line 76
Wolde lordis seche repreue,
Glosers shuld not go so gay,
Ne not so hardy for to meue
Suche wordes as they say.
Line 80
(11)
¶ Thouȝ prestes prechyng hem avyse,
Or mynstrallis synge in song now,
A glosere wole a lord askuse:
Sire, þey synge or preche of gow.
Line 84
Þe lord vnderstondes not how
Þe fals[e] glosere hym bitray;
Wolde he make þo wordis avowe,
He wolde auyse hym eft to say.
Line 88
(12)
¶ Many can stomble at a stre;
Þey nyl not snapere at a style,
And graunte purpos nay and ȝee,
Þouȝ his þouȝt be þens a myle.
Line 92
Whan falsed lawheþ, he forgeþ gyle;
Half in malice is his play.
Wiþ wysdom who so voydeþ that wyle,
He is [folio 102b] wys, all folk wole say.
Line 96
(13)
¶ Thouȝ men in erþe trouþe hyde,
On halle roof he wole be sayn.
In botme of see he nyl not byde,
But shewe in market, on the playn.
Line 100
