(16)
¶ ffalse men bye helle ful dere.
That taken with wrong, are goddis theues;
They han here heuene in this world here;
After in helle, huge myscheues.
Line 124
What they byleue, here werkys preues
Arn heretikes, and out of the Crede.
Why god doth loue, why god doth greues,
Man, knowe thy self, loue god, and drede.
Line 128
(17)
¶ Man, synne not in ouerhope;
Thou wynnest not goddis mercie with fight;
Hit wolde brynge the in wanhope,
To wene no mercy thou hauen myght.
Line 132
Alle thyng is nombred in goddis sight,
The leste tryp that euere ȝe trede.
His mercy is medled with his right.
Man, knowe thy self, loue god, and drede.
Line 136
(18)
¶ Mannes conscience wil hym telle,
Riche and pore, fool and wyse,
Whether he be worthi heuene or helle
To resceyue, after his seruyce.
Line 140
Eche man auyse hym, that is wys,
Pore, and prynce styf on stede,
Or vyces ouer vertues rys.
Man, knowe thy self, loue god, and drede.
Line 144
(19)
¶ Who that takeþ fro pore to eke with his,
ffor that wrong is worthy wo;
A-nother, richer than he is,
Of the same shal serue hym so.
Line 148
That ȝeueth to that liȝe or go,
Mete or drynke, herborwe or wede,
God sendes y-now to tho
That louen god, and hym wolen drede.
Line 152
