(8)
¶ That man that wole be gouerned by wyt,
ffle fro foly, and worldis delys;
Loke his charge how it is knyt,
And take counseil that is wys;
Line 60
ffolwe mesure in euene syse;
Lete no falshed blome ne sede.
And lawe be kept, no folk nyl ryse.
Than seruest god in loue and drede.
Line 64
(9)
¶ Whanne a fool stereth a barge,
Hym self and al the folke is shent.
There as conscience is large,
By wrath or mede the doom is went.
Line 68
The bowe of goddis wrath is bent
On hem that deth not that god bede.
War wordes of dowble entendement,
Knowe thy self, loue god, and drede.
Line 72
(10)
¶ Gif a kyngdom falle a chaunce
That al the rewme myght greue,
Aȝen that make an ordinaunce,
To kepe ȝow euere fro suche myscheue;
Line 76
And chastise hem that matere meue:
Make othere take ensaumple treuth to hede.
Who so is wys, his werkys preue.
Loue god, and ȝe thar not drede.
Line 80
(11)
¶ Goddis bowe of wratthe on vs was bent;
There we thenke al to lyte.
His ȝerde of loue on summe is lent,
With swerd of vengeaunce he summe doth smyte.
Line 84
The brydell with teeth thay byte
That of god taken non hede.
Or fendys alle ȝoure werkys wryte,
Man, knowe thy self, loue god, and drede.
Line 88
