(4)
¶ Eche man wot, that hath wyt,
These worldes goodes beth not his.
Alle is godes; he oweth hit,
And land and see, and pyne and blis.
Line 28
God wole haue rekenyng, ywys,
Of men and cloth, the leste shrede,
Thy getyng, thy holding, thy spendyng mys.
Man, knowe thy self, loue god, and drede.
Line 32
(5)
¶ Man of his owen hath no thyng;
Man is goddis, and al god sent.
God wole haue rekenyng
Of ryht and wrong, how it is went.
Line 36
Man, not nys thyn, alle god lent,
And borwed thyng mot home ful nede;
And ȝut thy soule is goddis rent:
Quyte that wele in loue and drede.
Line 40
(6)
¶ Serue god for helle drede,
ffle fro synne and al vys.
And ȝe loue god for heuen mede,
Ȝyue hym thyn hert fro fleschly delys.
Line 44
ffor worldly wys is gostly nys,
And fooles erande may not spede.
In begynnyng to be wys
Knowe thy self, loue god, and drede.
Line 48
(7)
¶ And ȝe wole wyte, thus mowe ȝe lere:
What man pursueth his soule to saue,
Ȝif hym be lef of god to here,
He ableth hym self mercy to haue.
Line 52
Richesse [folio 98b] and hele maketh wylde men raue,
That to vertues take non hede.
Er thy soule be fendes knaue,
Knowe thy self, loue god, and drede.
Line 56
