To longe in synne we haue layne;
ffor synne hath so oure soule thorow sought,
To helpe oureself haue we no mayne,
So moche woo hit hath vs wrought.
Line 32
But to the pyt when we be brought,
Then men woll wepe for the and me.
But certes all that helpeth nought
But Parce michi, domine.
Line 36
(4)
Vsquequo non parcis michi nec dimittas me vt gluciam saliuam meam? peccaui.
Or why so longe or thow wolt spare
Line 37
Me in synne that depe dyue?
Thow woldest suffer neuer more
Me to swolowe my salyue?
Line 40
I haue the gylt, and greuyd sore,
ffor synne with me hathe ben to ryue.
But, lord, now lere me with thy lore
That dedly synne fro me may dryue.
Line 44
And Ihesu, for thy woundes fyue,
As thow becammest man for me,
When I shall passe oute of lyue,
Than Parce michi, domine.
Line 48
(5)
Quid faciam tibi, o custos hominum? quare posuisti me contrarium tibi, et factus sum michimet ipsi grauis?
What shall I do vn-to the,
Line 49
O thow kepar of all mankynde?
Of suche a matiere why madest thow me,
To the contrarious me for to fynde?
Line 52
O fader of heuen, fayre and fre,
As thow art bothe good and hende,
Yet be kynde as thow hast be,
And spare me, lorde, that am vnkynde.
Line 56
Thy frenshyp, fader, late me fynde,
As thow art god in trinite.
Of thy mercy make me haue mynde
Wyth Parce michi, domine.
Line 60
