And he assignet hir a seite, þat hir-selfe liket,
Line 508
With chere for cherys the chiualrus Knightes,
As maner was of Maidones, with hir myld chere.
His comaundment to kepe sho hir course held,
And Joynet by Jason iustly to sit;
Line 512
And he welcomed þat worthy as he well kouthe:
A litill set hym on syde, & a seet leuet,
ffor to mele with þat maidyn & hir mode here.
The Kyng with other knightes hade comford to speike
Line 516
Ercules of armes, & auntres to telle
Of chiualry & chaunce, þat cheuyt hym before,
Þat no lede was lelly þo louers betwene,
But þai might say by hom-self all þere sad wille.
Line 520
MEDEA.
The woman was war þat no wegh herd,
And vnder shadow of shame shewid forth hir ernd,
With a compas of clennes to colour hir speche.
In sauyng hir-seluen and serche of his wille,
Line 524
"Now frynd," quod þat faire, "as ye bene fre holden,
Will ye suffer me to say, and the sothe telle?
Voidis me noght of vitius, [ne] vilaus of tunge;
Ne deme no dishonesty in your derfe hert,
Line 528
Þof I put me þus pertly my purpos to shewe.
Hit sittes, me semeth, to a sure knyghte, [folio 10b]
Þat ayres into vnkoth lond auntres to seche,
To be counseld in case to comfford hym-seluyn,
Line 532
Of sum fre þat hym faith awe, & þe fete knoweth;
This curtysy he claymes as for clere det,
And be chaunce may chere hym & cheue to þe bettur.
I wot ssir, ye are wight & a wegh nobill,
Line 536
Auntrus in armes, & able of person;
