All the cause of his come to Calcos was þan:
ffor the flammond fles þat fele had desyrid,
Line 376
He hade wille for to wyn & away lede, [folio 8a]
By leue of the lord þat þe lond aght.
After custome to kepe as the Kyng set,
Chethes full soberly & with sad wordes,
Line 380
Has grauntid godely þat he go shuld,
Soiorne þere a season, assay when hym lyke.
Be þan burdes were bred in the brade halle,
And þo mighty to meite meuit belyue,
Line 384
With all deintes on dese þat were dere holden;
Walid wyne for to wete wantid þai none,
In grete goblettes of gold yche gome hade.
The Kyng was full curtais, calt on a maiden,
Line 388
Bede his doughter come downe & his dere heire,
To sit by þat semely, and solas to make.
This maiden full mylde, Medea was callid,
Whan she sought into sale salute hom all,
Line 392
With loutyng full low to hir lefe fadir.
She was eldist & heire etlit to his londes,
Hym chefet thurghe chaunse childer no mo;
And she at hond for to haue husband for age,
Line 396
Byg ynoghe vnto bed with a bold knight.
She was luffly of lere & of lore wise,
And kyndly hade conyng in the clene artis:
Þere was no filisofers so fyn found in þat lond,
Line 400
Might approche to þat precious apoint of her wit.
THE CRAFTE OF MEDEA.
Of nygramansi ynogh to note when she liket,
And all the fetes full faire in a few yeres.
Wyndis at hir wille to wakyn in the aire,
Line 404
Gret showres to shede & shynyng agayne,
Haile from the heuyn in a hond while,
And the light make les as hir lefe thought; [folio 8b]
Merke at the mydday & the mone chaunge,
Line 408
