With a swoughe and a swetnes sweppit on þe grounde,
And all fowles in ffether fell þere vppon,
ffor to reckon by right þat to ryuer haunttes.
Line 344
Small briddes aboue in þe bright leuys
With shrikes full shrille in the shire bowes;
The noise was full noble of notes to here,
Thurgh myrth & melody made vppon lofte. [folio 7b]
Line 348
To this souerayne Citie þat yet was olofte,
Jason [a]ioynid and his iust fferis,
Steppit vp to a streite streght on his gate.
As þai past on the payment þe pepull beheld,
Line 352
Haden wonder of the weghes, & wilfulde desyre
To know of þere comyng and the cause wete,
Þat were so rially arait & a rowte gay.
So faire freikes vppon fote was ferly to se,
Line 356
So ȝonge and so yepe, ȝyuerus of wille,
ffolke fraynide fast at tho fre buernes,
Of what cuntre þai come & the cause why.
Was no wegh þat A word warpid hom too,
Line 360
But sewid furthe to the sale of Chethes the kyng:
þai bowet to the brode yate or þai bide wold.
The Kyng of his curtessy Kayres hom vnto,
Silet furthe of his Citie seriaunttes hym with,
Line 364
Mony stalworth in stoure as his astate wold;
Than he fongid þo freikes with a fine chere,
With hailsyng of hed bare, haspyng in armys,
And led hom furthe lyuely into a large halle,
Line 368
Gaid vp by a grese all of gray marbill,
Into a chamber full choise (chefe) on þere way, [MS. has "chese."]
Þat proudly was painted with pure gold ouer,
And þan sylen to sitte vppon silke wedis,
Line 372
Hadyn wyn for to wale & wordes ynow.
JASON
Then Jason to þe Just King (Joyuely) can say [MS. has "Joyntly."]
