That the fflese þat is ffreshe flamond of gold
Were brought throw þi boldness into þis byg yle
And þat wold doutles be done & no dere In,
Wold þu afforce þe þerfore and þe fight take,
Line 228
Be of gouernance graithe & of good wille.
Yiff þu puttes þe pristly þis point for to do,
Thou shall arayit be full ryolle with a route noble
Of my Baronage bolde & my best wise.
Line 232
I shall spare for no spence & þu spede wele,
And do þi deuer duly as a duke nobill:
Thou shalt haue holly my hert & my helpe alse,
And be lappid in my luffe all my lyffe after.
Line 236
Þu may be glad for to get such a good name,
And haue for þi hardynes a full hegh mede:
Leve þis for lell, me list it perfourme,
And to hold it with hert þat I hete nowe,
Line 240
I will fayne þe [no] faintis vnder faith wordes.
When my dayes be done þu shalt be Duke here,
And haue þe Crowne to kepe of þis Kyd Realme;
And while I liffe in this londe, no less þan my selfe,
Line 244
Halfe for to haue & hold for þi name,
And with all weghis to be worshipt to þe worldes ende."
WHEN PELLEUS his proses hade puplishit on highe,
And all soburly said with a sad wille,
Line 248
Jason was Joly of his Juste wordes,
Þat in presens of the pepull þo profers were made,
And mony stythe of astate stonding aboute. [folio 6a]
He hedit not the harme þat in his hert lurkyt,
Line 252
Ne the ffalshed he faynit vnder faire wordes;
He drede no dissayet of his dere vncle,
But hooped full hertely it come of hegh loue.
Þen he trist hym full tyte in his tried strenght,
Line 256
