Of the plentius plase & plesaund of lyue,
Line 12412
Mony weghes thedur went, & wond in the toune,
And Replenisshed the place & the playn londis.
The kyng was full curtas, þat þe kith aght, [folio 189b]
Myche louyt he the lede & the lell pepull.
Line 12416
ffor the wit of the wegh, & his wale dedis,
He was chosyn with þat choise chevest of councell,
And wele louit with the ledis of the lond all.
Now turne wyll I tite, & take þere I leuyt,
Line 12420
To the grekes agayne in the gret toune.
Cassandra the clere, the kynges owne doughter,
Þat abode in the burgh with bale at hir hert,
Hir modur & hir myld Suster martrid to dethe,
Line 12424
Myche water ho weppit, wailyng in sorow:
Hit was ruth any renke, þat Rioll to se!
When ho sesit o sicken, & sorow abated,
The kynges into councell callit hir þan,
Line 12428
To spir of hor spede, spekyn hir to:
Þan purpast þai plainly to pas out of londe.
The maidon to tho mighty menerly saide,
Hom shuld happon full hard in a hond while:
Line 12432
Agamynon the grete shuld grymly be slayn
With meneye of þat mighty, þat he most louet;
And othir fuersly be flemyt, & fallyn into angur.
All happit hom to haue as the hynd saide,
Line 12436
As I shall tell you full tite, & tary not long.
This Thelamon I told of, þat trayturly was slayn,
Two sonnes of hym-selfe, sothely he hade,
Þat he wan on his wyfes, as þe writ sais.
Line 12440
The first of þo fre faithly was cald
Emynent the mighty, with men þat hym knew,
Of Claustra the clere qwene, clennest of other:
Antissas þat tothir, tellis the story,
Line 12444
Ethimyssa his make to the mon bere.
