And for the losse and the lure of his leue sons,
Þat so dawly were ded, and drepit for ay,
So worthy in wer, & so wale knightes.
Þat he left was o lyue his lure was so hoge!
Line 11536
"And now is nedfull for noye, þat neghis at hond,
All my gold for to geue, þat I getyn haue,
Kepid in hurd, holdyn full long;
And I vnsure of my-self, my sorow is the more.
Line 11540
Þus in pouert am I pyght, put vnder fote,
Þat makes me full mad, & mournes in my hert;
And yet this lure were but litle, & our lord wold
Þat I might leng in my laund, & my lyf haue."
Line 11544
Thus Priam with pité playnet hys doole,
On what wise for to wirke wist not hym-seluyn.
He was forset vnfaire to folow þere wille, [folio 176a]
Þat purpost hom plainly to put hym to dethe.
Line 11548
Elan þat euermore was egur of sorow,
Herd tell of the trety was takyn with the grekes.
Þat noble on a night, þat no man persayuit,
To talke with Antenor toke ho the gate.
Line 11552
Sho prayet hym pourly with hir pure hert,
Of Menelay, hir maistur, to make hir a frynde;
And proker hir pes with his prise wordes,
Þat she might at þat myschefe to mercy be takyn.
Line 11556
All grauntid the gome to þe gay qwene,
ffor to proker hir pes, & pyne hym þerfore:
Þan ho lowtid the lede, & hir leue toke,
And past to the palis of the prise kyng.
Line 11560
With-in the tyme þat I tell, þe tru sun of Priam,—
Glaucon, was grauyn in a gay towmbe;
And the body of þe bold qwene broght vnto toune,
