And fell to the frigies fuersly anon,
Greuit hom full gretly, and to ground broght:
Woundit hom wickedly warppit hom doun,
Line 9924
And myche harme with his hond happit to do.
Troiell with tene turnyt with the kyng,
Gird hym to ground, & greuit him euill;
Woundyt hym wickedly, but no woth in,
Line 9928
Þat he light on the laund, þof hym lothe were.
Þan he hasted to horse thurgh helpe of his knightes,
ffore out of fight, and his folke hoole;
ffor the day ouer drogh, dymmet the skewis,
Line 9932
And all the buernes of the burgh busket to rest.
Than to Priam, þe prise kyng, prestly þai sent
ffor a tru to be taken with treatyng of mowthe: [folio 153a]
Sex monethes, and no more, þo mighty dessyret,
Line 9936
All parties in pes for to put ouer:
Of þis þe kyng and his councell carpit to-gedur.
By assent of his seniours, & sum of his knightes,
Hit was grauntid agayn, & grete men asurit;
Line 9940
And sum lacked the lede for þe long graunt.
In tyme of the tru, as tretis þe boke,
Breisaid the burd, vnbidyn of hir fader,
ffull duly to Dyamede dressit to wend,
Line 9944
Þat abode in his bed of his bale wound:
Oft tymes in the tru ho to his tent yode,
To comford the kyng in his cold angur.
Yet wist ho full well, þe wound þat he hade,
Line 9948
Betid hym of Troiell, þat was hir tru luff.
Oft ho waivet hir wit & hir wille chaunget,
And meuyt hir mynd, as maydons done yet.
Ho trust neuer with Troiell, terme of hir lyue,
Line 9952
To mell with in mariage, ne more of hir lust.
Ho purpost hir plainly, with all hir pure hert,
With Dyamede to dele, & do all his wille;
