With the Troiens to trete, & tene hom no more;
All hor lond for to leue, & hor lyue saue.
"Lakys now, ledys, what you lefe think,
And what ye deme to be done at this du tyme."
Line 9808
When the souerain hade said, sone opponon,
Menelay meuyt vp, & with mouthe saide:—
"fforto trete with the troiens ys no tyme now,
Ne no worship, I-wis, but a wit feble.
Line 9812
Syn Ector ded is of dynt, & Deffibus the knight,
And other kynges ben kyld, þat cleane were of hond,
The Troiens full truly trusten no bettur,
But dernly to degh: þai demyn non other.
Line 9816
I am sekir, for-sothe, and sadly beleue,
Withouten helpe of þat hathell vs hastis an end."
Then Nestor þe noble duke, another—Vlixes,
Saidon to the souerayn sadly agayn:—
Line 9820
"Þof þow wylne to þe wer, wonders vs noght,
Syn þi hert is holly the harmys to venge;
Thy wyf for to wyn, þat þou well loues,
And to grefe hom agayne, yf þou grace hade:
Line 9824
But yet trust not þat Troy will titly be wonyn,
Þof derfe Ector be dede, and Deffibus alse.
There is another als noble & nait of his strenght, [folio 151b]
& als wondurly werkes in wer vppon dayes;
Line 9828
That is Troilus the triet, þat tenes vs full euyll,
And fuersly in fight fellis our pepull.
Þof Ector were eftsones ordant alyue,
He kylles our knightes, kerues hom in sonder:
Line 9832
And Paris, a prise man, pert of his dedis;
Was neuer Deffibus so doughty & derfe of his hondes.
Therefore, sirs, vs semyth sothely the best,
With the Troiens to trete & turne to our londes,
Line 9836
With the harme, þat we haue, of our hede kynges,
