THE DETHE OF AMPHENOR AND DURIWS BY ECTOR SLAYNE.
There-at Ector was angry, & out of his wit!
Two kynges he kyld of the kene grekes,—
Line 7704
Amphenor the fuerse, and the freike Durius;
And wonderfully wroght at the wode stoure.
Thurgh pouer of the prinse & his pert knightes,
The Troiens turnyt in full tyte, tokyn the fild,
Line 7708
ffoghtyn full fuersly, fell mony grekes,
Beron hom abacke with a breme wille.
Then kyng Bisshop the bold fro the burghe come
With thre thowsaund þro knightes, þrong into batell,
Line 7712
All wight men in wer, willy to fight,
And boldly the bekirt, britnet þere fos.
There come with this kyng a coynt mon of shappe,
ffellist in fight, and a fyn archer:
Line 7716
ffro the Nauell netherward he was an able horse,
And euyn made as a man fro the medill vp.
The fell of þat freike, fuerse to beholde,
ffro þe hede to þe hele herit as a capull!
Line 7720
Thof his face was fourmyt as a fre mon,
Hyt was colourt by course as a kowlt red.
His Ene leuenaund with light as a low fyn,
With stremys full stithe in his stepe loke.
Line 7724
He was a ferfull freke, in fas to beholde;
And mony ledes with his loke laithet full euyll!
He neyt as a nagge, at his nose thrilles!
No hawberke he hade, ne harnes of mayle,
Line 7728
But bare into batell with a bowe stronge, [folio 120a]
With gret arowes & grym in a gay qwyuer.
When this feerfull freike frusshet into batell,
The grete horses on the grene girdon abacke,
Line 7732
Sparit for no Spurse, speddyn to the flight,
And grete affray in the fild for feare of hym one.
