And þou faithly shall fynd, in a felle haste,
A hundrith thowsaund þro men þriuand in armys,
The weghes to wound & warpe vnto dethe.
And if þou sothely of sorow set be so full,
Line 5064
ffor two buernes all bare & of body nakyd,
I hope your bolnyng with brest, & your brethe leue
To qwhiche pouer, playnly, þou proues no strenght,
Ne no suertie, may saue fro þere sid harmys."
Line 5068
Mony knightes in the courte, þat by the kyng stode,
Wex wroth at his wordes, walt into yre;
Warpit out wordes full swice at the kyng,
And drogh taward Diamede to dere hym anon,
Line 5072
ffor to britton þat buerne for his bolde speche.
THE WORDES OF PRIAM AGAYN.
Priam þen presit vp fro his proude sete,
Bade hom blym of hor brathe or hor bare lyues,
Þat no gome shuld hym greue with no grym weppon,
Line 5076
Ne negh hym with noy for noght þat he said.
"Syn the wit of no wise man shuld walt into yre,
Ne be fuerse on a fole, þat foutly hath wroght;
ffor it falles to a fole his foly to shew,
Line 5080
And a wise man witterly his wordes to suffer.
As it is fre to a fole foly to carpe,
So is it wit, a wiseman his wordis to listyn,—
Laghe at it lightly and let it ouer pas;
Line 5084
ffor in speche may men spie the speker to know,
And wete, by his wordes, the wit þat he beires.
I wold sothely, my-seluyn, suffer full harde,
Or any messanger were mysdon, or marrit with hond
Line 5088
Within my courtte, or my cumpany, for any cause here.
