With daunger and drede of a dede hate,
ffor a lure þat was light & of long tyme; [folio 34b]
Þat wold ȝepely haue bene forȝeton in yeres a few,
Line 2068
And neuer menit with mowthe but þurgh mishap.
Thow se not þat sothely said ys of olde,
And oft happes to hit qwo so hede tas:—
"He þat girdis with grete yre his grem for to venge,
Line 2072
Ofte shapis hym to shote into shame ferre,
With hoge harmes to haue, & his hert sarre."
Hit is siker, for sothe, and a sagh comyn,—
"He þat stalworthly stondes, stir not to swithe,
Line 2076
Lest he faile of his fotyng and a falle haue;"
ffor he þat set is full sad on a soile euyn,
And pight has his place on a playn ground,
Hym þar not hede to be hurt with no hegh falle,
Line 2080
Ne be lost þurgh his lip to þe low erthe.
But þou put þe, priam, to so proude Aunter,
ffor to heuyn on þi harme in a hegh yre;
And þi fall was so fuerse with so fele other.
Line 2084
Thy Cité and þi soile sesit of þi hond;
Thow dungen to dethe, and þi dere sonse;—
Thi lege men lost, and of lyue done.
Thurgh vnwarnes of wit þat þi wirdis cast,
Line 2088
Thow ges matir to men mony day after,
fforto speke of þi spede, & with spell herkyn
Of þi lure and þi losse for a high wille.
Now what felle þe be fortune, & þi fre pepull,
Line 2092
All in coursse how it come I will carpe ferre,
And turne agayne to my tale, qwill I tome haue.
Priam by purpos a perlament assignet,
And gedrit all þe grete in his grym yre:
Line 2096
Euyn into ylion þai entrid by dene,
There þe souerain was set in a sete rioll,
And all þe lordes of þe lond, with his lefe childur.
