Sone he raght vpon rowme, rid vp þe dykis,
Serchit vp the soile þere þe Citie was,
And byld vp a bygge towne of þe bare vrthe,
In the nome of Neptune þat was a noble god.
Line 1536
THE DISCRIPCION OF TROYE.
This Cite was sothely, to serche it aboute,
Þre iorneys full iointly to ioyne hom by dayes:
Was neuer sython vnder son Cite so large,
Ne neuer before, as we fynd, fourmyt in vrthe,
Line 1540
Nonso luffly on to loke in any lond oute. [folio 26b]
The walles vp wroght, wonder to se,
With grippes full grete was þe ground takon
Bothe Syker & Sad, þat selly were þik
Line 1544
ffro the vrthe vpward vne of a mesure.
Of the walle for to wete to þe wale top,
xx Cubettes be coursse accounttid full euyn,
Þat of marbill was most fro þe myddes vp,
Line 1548
Of diuers colours to ken craftely wroght.
Þat were shene for to shew & of shap noble,
Mony toures vp tild þe toune to defende,
Wroght vp with the walle as þe werke rose,
Line 1552
One negh to Anoþer nobly deuyset.
Large on to loke, louely of shap,
In the Sercle of the Cite were sex faire ȝates,
ffor entre & yssue & ease of þe pepull.
Line 1556
The furst and the fairest fourmet was Dardan,
Tricerda, Thetas, Troiana, þo foure;
Anchinordes, Hylias, heght þe two other,
With grete toures vmb-tilde & torettis aboute,
Line 1560
Well wroght for the werre, wacches O lofte.
Ymagry ouer all amyt þere was,
Of bestes and babery breme to be holde,
Bost out of þe best þe byg toures vmbe.
Line 1564
The wallis in werre wikked to assaile
With depe dikes and derke doubull of water.
