There beginnys the Fyfte Boke: Of the Foundyng of new Troye and of the Qwerell of Kyng Priam ffor his ffader dethe.
Now as þis kyng vmbe the Castell lay closit abute,
With his folke all in fere & his fyn childur,
He was enformyt of þe fare & of his fader dethe; [folio 26a]
How his towne was takon and tirnyt to grounde;
Line 1512
His Suster sesyd and soght into syde londis;
His knightes downe kylde vnto cold vrthe.
Soche sikyng and sorow sanke in his hert,
With pyté and complaint pyne for to here,
Line 1516
He toke vp his tentes & the towne leuyt,
Teght hom vnto Troy with tene þat he hade,
Segh the buyldynges brent & beton to ground.
Soche wo for þat werke þan þe wegh thowlit,
Line 1520
Þat all his wongys were wete for weping of teres,
Thre dayes þroly, with thricching of hondys,
And drowpet of dole as he degh wold.
Þen he sesit of sychen & his sorow voidet,
Line 1524
Mendit his mode & his mynd stablit,
Toke councell in the case & his care leuyt.
The styfe towne to Restore & so strong make,
ffor daunger and drede of enny derfe enmys,
Line 1528
Gate masons full mony, þat mykull fete couthe;
Wise wrightis to wale werkys to caste;
Qwariours qweme, qwaint men of wit;
Mynors of marbull ston & mony oþer thinges.
Line 1532
