And þere barnes on brest bere In þere armes,
Hyd hom in houles and hyrnys aboute.
Maydons for mornyng haue þere mynde loste,
(Soche payne of a pepull was pitie to be-holde)
Line 1364
Hurlet out of houses, and no hede toke
Of golde ne of garmenttes, ne of goode stonys;
ffongit no florence, ne no fyn pesys,
Gemys ne gewellis, ne no ioly vessell,
Line 1368
But all left in hor loges & lurkit away.
The Grekes were full gredy, grippit hom belyue,
Prayen and pyken mony priuey chambur,
ffongit þere florence and oþer fyn gold,
Line 1372
Geton girduls full gay, mony good stonys;
Wele wantid no wegh wale what hom liste.
A monyth on þis maner meuyt no ferre,
But soughton vp the Cité vpon sere haluys,
Line 1376
Grippit vp the grounde, girdyn doun þe wallys,
Prowde pales of prise puttyn to grounde;
Brent vp the byggynges & full bare maden;
The temple ouer-turnyt, tokon þe folke,
Line 1380
Dydden all to the dethe & for ne drede lettyd;
Wemen, wale childur, & other weike pupull,
Madens full mony & of mete Age,
Sesit hom sone in seruage to holde.
Line 1384
EXIONA, THE KINGES DOUGHTER LAMYDON.
When the pales was put doun of þe prise kyng,
Þai fonde þer a fre faire to be-holde,
Euyn of his owne doughter Exiona was callid.
Bannet worthe the bale tyme þat ho borne was,
Line 1388
ffor the care þat þere come because of hir one.
Ercules egerly euyn vponone
Betoke hir to Telamon, for he the towne entrid,
In reward as by right for his ranke wille. [folio 24a]
Line 1392
POETA.
But caitif unclene, for thy curst dede!
