(8)
¶ Þeos are þe werkes of Merci seuene,
Of wȝuche crist wol vs areyne,
Þat alle schul stoney wiþ þat steuene
Þat euer tresoun miȝte a-teyne.
Line 88
ffor heer but ȝif we make vs euene,
Þer may no miht ne ȝiftes ȝeyne.
Þenne to þe kyng of heuene,
Þe Bok seiþ þat we schul seyne:
Line 92
"Wher hastou, lord, in prisoun leyne?
Whonne weore þou in eorþe dwellyng?
Whon seȝe we þe in such peyne?
Whon askedest þou vs eny þing?"
Line 96
(9)
¶ "Whon ȝe seȝe ouþer Blynd or lame
Þat for my loue asked ȝou ouȝt;
Al þat ȝe duden in myn name,
Hit was to me, boþe deede & þouȝt.
Line 100
But ȝe þat hated cristendame,
And of my wraþþe neuer ne rouȝt,
Ȝour seruise schal ben endeles schame
Helle-fuir þat slakes nouȝt.
Line 104
And ȝe þat wiþ my blood .I. bouȝt,
Þat loued me in ȝoure lyuynge,
Ȝe schul haue þat ȝe haue souȝt,
Merci þat passeþ alle þinge."
Line 108
(10)
¶ Þis tyme schal tyde, hit is no nay,
And wel is him þat haþ þat grace
ffor to plese his god to pay,
And Merci seche while he haþ space!
Line 112
ffor beo vr mouþ crommed with clay
Wormes blake wol vs enbrase:
Þen is to late, Mon, in good fay,
To seche to A-Mende of þi trespace.
Line 116
With mekenes þou may heuene purchase:
Oþer Meede þar þe non bring,
But knowe þi god in vche a case,
And loue him best of any þing.
Line 120
