Huy eten and dronken and maden hem glad,
Here lyf was al in Ioye a-lad,
Men knevleden hem bi-fore;
Line 129
Huy beren heom here so swiþe heyȝe
Þat þoruȝ twinklingues of heore eyȝen
Heore soules beon alle for-lore.
Line 132
Ȝware beoz þulke þat couþen so wel
With vnriȝhte and wrongliche echdel
Winne rentes and londes,
Line 135
And nolden nouȝht here beon aknowe
Þat it was unriȝhtfulliche heore owe,
For þe worldes schonde?
Line 138
Þulke þat deiden on vrþe here
And wonnen ouȝht in swuch manere,
Londes oþur rente,
Line 141
For soþe i segge it eou to-wisse,
Huy ne comiez neuere in heuene|b[l]isse,
Ake in helle huy schullen stunte.
Þei huy ligge sike longue
And in heore dez-bedde þienchez "mid wronge
To þulke þing we come,"
Line 147
Fain huy wolden, hadden huy space,
Ake manie nabbez þer-to no grace,
To ȝelden a-ȝein eft-sone.
Line 150
Þare seith þe bok a-pliȝht
Þat eorl ne baroun cler[c] ne knyȝht,
Bacheler ne sweyn,
Line 153
Noþing ne mouwe huy with onriȝht.
In þis manere habbe no wiȝht,
Bote huy it ȝelden aȝein.
Line 156
Ȝware is þis hoppingue and þis song,
Þis ridingue and þis proute ȝong,
Þis hauekes and þis houndes?
Line 159
Al þat weole is went awey;
Þat Joyȝe is come to weilawey,
And to mani harde stoundes.
Line 162
Þole þou, man, ȝif þat þou miȝht,
A luyte pine þat man þe bit;
With-drauȝh þine ayses ofte.
Line 165
Þei þine pines þe þinchen on-lede,
Þou þench opon þe muchele mede:
Hit schal þe liken softe.
Line 168
