But god wolde þat hit were so,
To chastise hem and oþer mo
Þat to churche gun gon.
Line 366
Til a Masse was seid to ende,
A Mon schulde talke with fo nor frende,
But holde him stille as ston;
Line 369
Þat hous was mad for preyere
To Ihesu and to his Moder dere,
To þonke hem al heore lon.
Line 372
At þe wyues gon þei witen
What þei seiden whon þei siten
Seynt Austyn hem bi-syde,
Line 375
Bi heore onswere þei wuste ful wel
Þat þei hedde spoken muchel vncel,
And in heore hertes gun hyde.
Line 378
Þerfore, sires, I rede ȝe loke,
God tent I wolde ȝe toke,
ffor þing þat may bi-tyde,
Line 381
Þat ȝe mesure ȝou þe mare,
Of speche þat ȝe ow spare,
At Masse whon þat ȝe byde.
Line 384
Þe Pope [Pope erased.] greued him wel þe lasse;
He let comaunden at þe Masse
Of þat Miracle to mynne,
Line 387
And also bad wiþ ful good wille
Þat eueri Mon schulde stonde stille
Whon he comeþ þe churche with-Inne;
Line 390
And þenke [MS. þenne] hou wel þat god may wreke
Euerich a word þat we speke;
We do ful muche synne:
Line 393
A Prest miȝt be let of his mes,
Al þis world miȝt fare þe wers,
Vs alle to wo to wynne.—
Line 396
"Vr ffader vre al-weldyng is, [folio 303:3]
God let vs neuere his murþes mis.
Lord, halwed be þi name.
Line 399
In heuene and eorþe þi wille
Be don, and þat is skille,
Or elles we ben to blame.
Line 402
