Þat nis not also muche tyme
Aȝeynes þe tyme þat comeþ afterward
As fro þe sonne-rysing to prime—
To sunfol men þat is ful hard.
Line 192
Þat I schal seye nou takeþ kepe,
I drawe to witnesse seynt Austyn:
Þat a Mon schal more wepe
Þat dampned is to helle-pyn,
Line 196
Þen is water vnder þe sonne,
And he wepe vche day a ter.
Auiseþ ow now, ȝif þat ȝe cunne,
And doþ þat ȝe ne come not þer!
Line 200
A Mon þat dampned is to helle,
His peyne may not ben for-bouȝt,
Ac endeles he schal þer dwelle;
Almes-dede helpeþ him nouht.
Line 204
Þei alle men þat libbeþ nouþe
Weore prestes Masses to synge,
And duden al þat þei euer couþe,
Ne scholden him of pyne bringe.
Line 208
Þat ilke soule þat is dryuen
Wiþ fendes in atte helle-ȝate,
And his Iuggement be him ȝiuen,
To bidde Merci hit is to late.
Line 212
Heuene hit is vre heritage,
To vre bihoue hit is diht,
[Ȝif] [om.] we han do feute and homage
To vre lord, as hit is riht.
Line 216
Synful mon, ȝif þat he falleþ,
A-Rys vp and mak þi pees,
And cum to crist, whon þat he calleþ
To Ioye þat is endeles.
Line 220
He þat is al-mihti kyng,
Þat heiȝe sitteþ In Trinite,
Graunt vs alle his blessyng,
AMEN AMEN par charite.
Line 224
