Bot more help mot open heuen-ȝates the agayn.
Who-so suld agayn blis to man [r. mankynd?] wynne,
Him behoued be a man that myȝt noȝt synne,
Line 140
And he most ay fulfille alle goddes wille
And neuer in thoght, word, ne dede don non ille;
Slik on myȝt, if he wald, a gode raunson wage
And bye agayn both man & [r. & mannis?] heritage.
Line 144
Bot slik a man in erth myȝt neuer be made,
If he of all creatours all vertues hade.
Of the restoring of the warld.
A Kyng ther was of souerayne worthines,
fful of mercy & wysdam & all godenes.
Line 148
A sone he hadde, knewe all his wille,
And myȝt and wald al hit fulfille.
Thai were ay bothe al on substaunce,
And betwix theim was no distaunce;
Line 152
What as the fader wald haue amendyd,
By his sone godely hit suld be endid.
ffour doghters hade this grete kyng,
That fulfillid all his likyng;
Line 156
Thai were of his substance ilkon,
And all that substance was bot on.
Thai foure doghters thurgh comune assent
Parformed al his iugement.
Line 160
Bot if thise foure vse ay wele thair myght,
May neuer no rewme be rewled right.
The names of thaim with-outen les
Are: Mercy, Sothfastnes, Right, & Pes.
Line 164
Mercy, when sho hade parceyued
How all man-kynde was deceyued
Thurgh the fende that be foul treson
Has geten him to his prison
Line 168
And euermore with enuy
Will torment him as enemy,
Sho was so stered to compassion
That sho wald deliuere that prison.
Line 172
