Alle thing vnder heuen made was to mannes solace,
And therfor, syn he synned, all thai lesse vertue has.
All man-kynde for-thi was put to thraldom of the fende,
And bounden all to his prison ay with-outen ende.
Line 68
How may thrall with riȝt clayme a thing of fre heritage?
With his lord may he noȝt mote, ne non of his lynage.
Thus was all this world lost; ther was no help in creature.
Bot god wist what was his wil, that of all thing has cure.
Line 72
Of the ten commaundements. [This passage is added to the Fr.]
THen with the x commandements god forbed all synne
& taght man how he myȝt him gret mede wynne.
The first is, to worschipe on god and no mo.
This biddyng sal be vnderstanden so
Line 76
That it forbedes all mamettrie,
And also all maner of sorcerie.
Mammentrie is, to do creature that honour
That thou suld do all-onely to thi creatour,
Line 80
That is, worschipe him for him-self ouer all other thing.
A seint sal thou worschipe for he is his derlyng.
Ymages in the kirk that thou on lokes,
Are to the as to the clerk are his gode bokes:
Line 84
Thou sal not worschipe thaim bot for thair [r. that?] sake
That thei bringe to thi mynd thi prayer to make.
The second is: tak not the name of thi god in vayn.
Ilk fals oth, vnleful & idel [swering om.?] is ther-agayn;
He is ay in peril of synne dedly
Line 89
That sweres bi goddis hert or any party.
This biddyng forbedes alle heresy,
And also all feyned and fals ypocrisy.
Line 92
The thrid is: thou sal kepe wel thi haliday.
That is thus mekel openly for to say:
Put fro the synne & bodely werkyng,
And gif the to god with hertly prayng.
Line 96
Tak kepe here that on halyday marchandyse
Lettes man oft of goddes seruise.
The ferd is: worschipe thi fader & thi moder.
