And ȝiueþ wit and auhte : But not alle I-lyche.
Whon he haþ I-ȝiuen his þing : As Ichaue I-seyd,
Vche mon of his del : Schulde holde him paid;
No mon schulde grucchen : Of oþeres wel-fare,
Line 348
And ȝif he doþ, for soþe : He mispayeþ god þare.
ffor god wol ȝiue : To whom his wille is.
Whose haþ envye þer-to : ffor soþe, he nis not wys."
ÞE false schrewe onswerde þore
Line 352
And bad hym sigge so nomore.
"Þou spekest of wraþþe in þi tale
And seist hit is aȝeyn soule-hale.
Þat is not soþ, but falshede;
Line 356
Wraþþe was neuere synful dede.
Ȝif eny mon a-gult aȝeynes þe,
Smyteþ or elles puiteþ þe,
Oþer seiþ þat þe is him loþ:
Line 360
Ne most þou þenne nedes be wroþ?
Ȝif Mon mis-seiþ þe or deþ þe schame:
Ȝif þou be wroþ, ho schal þe blame?
As he doþ bi þe, niȝt and day,
Line 364
Quit him wel, ȝif þat þou may;
Ȝif þou mowe, worse; in eny wyse
Loke þou ȝelde him his seruyse;
Ȝif þou forberest O bisemare,
Line 368
He wol ȝiue þe two ful ȝare.
Aȝeyn o word sei þou two
And mak him wroþ, ar þou go,
And spek wiþ hym baldeliche
Line 372
And mis-seye hym schomefulliche!
Ȝif eny Mon þe mis-deþ,
Smyt þyn hond vnder his teþ,
Wiþ Swerd, Knyf, Staf or Ston
Line 376
Lei on faste, and þat anon,
And bet him wel wiþ þe beste,
Þat his teþ al to-breste;
Or on þe hed ponne hard,
Line 380
Þat he go wryȝinge þenneward.
Ȝif he is strong or of miht heiȝ,
Þat þou ne miht comen hym neiȝ,
Tac þe felawes þe by-syde:
Line 384
