Þat suffredest for me þis harde paas!
At myn ende hit be my solas.—
Line 984
Of Contemplacion of god in his owne kynde.
Þus schaltou þenke on his Monhed.
Now schal I teche of his godhed,
Þat from vr knowyng sumdel is hud,
And in foure wise to vs is kud:
Line 988
In Creature, and in holy writ—
Þerof Ichaue my tale quit;
Þe þridde be Reuelacion,
Þe ffeorþe be monnes reson.
Line 992
Bi Reuelacion God scheweþ him-selue
As he dude to þe prophetes twelue
And to oþere Mony on,
Or be Miracle open I-don.
Line 996
Bi reson þus God maiȝt þou kenne,
Ȝif þou wolt þe be-þenke whenne
Þou were nouȝt or þou boren were;
Of oþer Creatures þe same manere,
Line 1000
Þat comen & gon eueriche day;
Þe soþe þer-bi wel wite þou may
And bi reson vndertake
Þat þei miȝt not hem-seluen make;
Line 1004
Heore biginnynge seþþen þou maiȝt se,
And of hem-self þei mowe not be,
Þenne mostou nede grante sum þing
Þat neuer hedde no bi-gynnyng,
Line 1008
Oþur þynges of whom comen alle,
God Almihti þat men calle.
But twei goddes ȝif þat þer were,
Þer moste nede be sum manere
Line 1012
Of diuersete hem bi-twene—
Al on elles moste þei bene;
Þen moste þat on, as wel I wot,
Sumwhat haue þat þe toþer hedde not;
Line 1016
Þen hedde þat on, sikerliche,
Ouþer to luyte or to muche;
Ȝif þat he hedde to luitel,
He were not god almihtful;
Line 1020
