ÞEn sauȝ poul a serwȝful siht—
And he loked þer forþ riht:
An Old mon sat þer wepynge
Bi-twene four deueles foul ȝellynge.
Line 176
Poul asked what he was.
And þe Angel seide in plas:
"He was Neclygent aȝeynes forbod
And kepte not þe lawes of God,
Line 180
He nas not chast of bodi i-souȝt
Ne of herte ne of his þouȝt,
But euer he was Couetous,
Proud of herte and contrarius;
Line 184
Þerof nolde he him not schriue
Ne do no penaunce bi his lyue,
Þerfore he schal beo pyned ay
Wiþ-outen Noumbre til domus-day."
Line 188
POul wepte and bigon to goule.
Þe Angel seide: "whi wepustou, poule?
Ȝit sayȝ þou not, as I þe telle,
Þe strengest peyne þat is in helle."
Line 192
Þe Angel him schewed wiþ-outen weoles
A put a-scled wiþ seuen seles.
He bad him stonde bac, for þat þing,
Þat he mihte sustene þat stynk.
Line 196
He opened þe Mouþ of þat put:
Hit stonk foule wȝon hit was vnschut;
Þe stynk þat com out of þat plas
Passed al þe peynes and stinkes þer was.
Line 200
Þen seide þat Angel, to biginne:
"Hose comeþ þis put wiþ-Inne,
Bi-fore God and vre ladi
Schal neuer of him beo no merci."
Line 204
POul askede: "wȝuche ben þo
Þat schulen to þis peyne go?"
He seide: "hose leeueþ not in wone
Þat Iesu crist, Godus sone,
Line 208
Tok fflesch and blod of þe virgine Marie
And seþþe was boren of hire bodye;
And also þulke, I telle hit þe,
Þat neuer wollen Baptiȝed be,
Line 212
