Heil Botenere of eueri bodi blynde,
Heil Borgun brihtes[t] of alle bounte,
Heil trewore þen þe wode-bynde:
Þou pray for us to þi sone so fre. Aue.
Line 60
Heil Modur, heil Mayden, heil heuene-qwene,
Heil ȝatus [r. ȝate] of paradys,
Heil Sterre of þe Se þat euere is seene,
Heil riche, Ryal and Riht-wys;
Line 64
Heil Buyrde, I-blesset mote þow beene,
Heil perle, of al perey þe pris,
Heil Schadewe in vch a schour schene,
Heil fayrore þen þe flour delys;
Line 68
Heil cher chosen þat neuer nas chis,
Heil chef chaumbre of Charite,
Heil in wo þat euere was wys:
Þow prey for vs to þi sone so fre. Aue.
Line 72
Heil welle of merci, watur of lyf,
Heil gentel ȝerde of Iesse Roote;
Heil Mayde, heil Moodur, heil wedded wyf,
Þi blessednes brouht us til vr bote;
Line 76
Heil studefast stuntere of eueri strif,
Þe feirest þat euer ȝeode vppon fote;
ffrom vs vche a deuel þou deest drif;
Heil swete, heil swettest, heil most swote;
Line 80
Heil Mayden þat for vs most mote,
Heil puired princes of pite,
Heil Mirour vche mon on to tote:
Þow pray for vs to þi sone so fre. Aue.
Line 84
Heil holy herte, hope of hele,
Heil fostrere of vre ful fay,
Heil worchere of þis worldly wele,
Heil wissere of vre rihtwys way,
Line 88
Heil fallere of þe fendes fele, [or. frele]
Heil logge þat vre lord in lay,
Heil Chartre þat Ihesus gon a-sele:
ffor vs, ladi, to þi sone þou pray
Line 92
Þat at þe dredful domus-day
Vre a-vokes þat ȝe may be,
ffor non oþur þen help us may
Saue þi-self and þi swete sone fre. Aue.
Line 96
