¶ Quintus passus Alexandri.
Ashmole
Sone eftir in a seson · as þe buke sais,
Come driuand fra Darius · þe deyne Empereure,
Heraudis on heȝe hors · hendly a-rayed,
To ser Philip þe fers · to feche þar trouage.
Line 884
Litill kyngis þar come · as þe clause tellis,
Liȝt doune at þe loge · & þar blonkis leues,
Caires in-to þe curte · to craue him þar dettis,
Touchis titly þar tale · & tribute him askis.
Line 888
"Ȝa, caires hame," quod Alexander · "a-gayn to ȝour kithes,
And sais ȝour maister, he make · na ma sandis;
For sen Philip had a fresche son · þat fast now encressis,
Line 891
Þat bees noȝt suffird, I supose · nane slike him to ȝeld.
For sais ȝour lord, þe lefe hen · þat laide hir first egg, [MS. 'eȝe', corrected to egg.]
Hire bodi nowe with barante · is barely consumed,
And is Darius so of his dett · duly depryued;
And be þis titill, him tellis · na tribute him fallis."
Line 896
Þen merualid þam þe messangirs · mekill of his speche,
His witt & his wisdome · wonderly praysed.
Faire at ser Ph[ilip] þe fers · fang þai þar leue,
Line 899
And syne clene of all þe curte · & cairis to þar landis.
To þe palais of þe proude kyng · to persie þai went,
Dose þam in to Darius · þar he on dese syttis,
And telles him how his trouage · is tynt al-to-gedire, [folio 16a]
