And he seyde . . . . . [So in MS.: a name, but not the right, or something to the same effect, is missing. See the note.]
The dewke comawndyd, he shulde haue
A feyre chaumbur and a knaue.
Line 5856
Lytull wyste dewke Oton,
Who schulde kepe hys pryson.
¶ For seynt Thomas loue of Cawnturberye,
Fylle the cuppe and make vs mery.
Line 5860
Now haþ Gye all hys wylle
In the courte boþe lowde and stylle.
To the court Gye ys gone:
He fonde a pryson of lyme and stone.
Line 5864
xl fadoms hyt was depe:
Thereynne he harde oon sore wepe.
Gye askyd hastelye, [folio 198b:2]
Who hyt was, þat made that crye.
Line 5868
'I am a wrecche, a caytyfe:
Me forthynkyth, y am on lyfe.
Erle Tyrrye was my name:
Ther was neuer man, þat had more shame.
Line 5872
I am in a dongeowne
And myssayde of dewke Oton.
I bere on me yron more
Then euyr man dud before:
Line 5876
All my body weyeth, as ledde,
Lorde, þat y wolde fayne be dedde.
I was felowe wyth a knyght:
In all þys worlde ys none so wyght.
Line 5880
For þe dewke myght not hym sloo,
On me þe vengeawnce wyll he doo.
Thys thre dayes ete y no mete:
I muste dye for hungur grete.'
Line 5884
¶ 'Be stylle,' seyde Gye, 'herkyn a þrowe;
For y am Gye, þyn owne felowe:
I schall delyuyr the of pryson.'
