¶ 'Syr,' quod Gye to the emperowre,
'Schall y neuyr be traytowre.
Line 3200
Hyt was me tolde in the cyte,
That nede had ye none of me
Nor no wylle of my seruyse,
For y serued yow wyth fantyse. [MS. fantasyes.]
Line 3204
Therfore thedur wyll y fare
And my seruyse schall be thare,
Or ellys y wolde not agenste yow be
For all the golde in crystyante.'
Line 3208
¶ The emperowre anon ryght
Askyd hym and seyde ȝyt:
'My dere frende, turne ageyne:
Therof wolde y be full fayne.
Line 3212
And all schall be at thy wylle,
What þou wylt haue lowde or stylle.
For noþyng, þat men may say,
Wyll y be wrothe, be my fay.'
Line 3216
¶ Now be they kyssyd and cordyd well [folio 181b:2]
And all forgeuyn every delle.
There at the furste Gye perseyued,
That þe steward hym dysseyued. [MS. betrayed.]
Line 3220
Gye hyt on hys harte layde
And wolde hym not þerof vpbrayde.
'Syr emperowre,' seyde syr Gye,
'Herkyn to me, wytterlye.
Line 3224
We schall be beseged wyth oost vnryde
Abowte þe cyte on euery syde,
Wyth sarsyns bothe black and kene
Wyth full grete force, as y wene:
Line 3228
To the cyte wyll they fare
Wyth grete ooste and mekyll mare.
Hymselfe sowdan wyll come hedur
And all the sarsyns wyth hym hedur. [togedur? The whole line written in the margin by the same hand.]
Line 3232
