(16) Domine, labia mea aperies: & os meum annunciabit laudem tuam.
Lord, my lippes þou schalt vndo,
And my mouþe schal þi prechinge [for preisinge] spelle;
Thi mercy & þi myȝt also,
Soþfastly no tunge may telle;
Line 124
For when we dedly synnë do,
Thi riȝt vs demeþ doun to helle;
But when we ceesen & wol saie 'ho!'
Thi mercy is oure waschynge welle.
Line 128
(17) Quoniam si voluisses sacrificium dedissem utique: holocaustis non dilectaberis.
Ȝif sacrifice hadde ben offrynge,
I hadde to þee ȝyuen with hert fre;
But certeynly hit is none suche þinge,
That, to þi, plesaunt may be.
Line 132
Thi self was offrid a child ful ȝynge, [folio 100]
And afterwarde on þe rodë tre
Oute of þin herte þat blode gan sprynge,
And þer-fore myn hert I offre to þee.
Line 136
(18) SAcrificium deo spiritus contribulatus: cor contritum & humiliatum, deus, non despicies.
To god hit is a sacryfice,
A synful spirit to sorwe sore;
A meke hert [þou] schal noȝt despice,
Whan répentaunce hit wol restore.
Line 140
I haue for sleuþe [left] þi seruyce,
And litel lyued aftur þi lore;
But I repente, & wille now aryse;
Mercy, god! I wolle no more.
Line 144
