(25)
¶ "I haue myspendid my ȝong age
In synne, & wantownesse also;
Y haue be slow, and loued to rage;
A glotoun, a letchour, y was boþe two.
Line 240
I am worþi to haue noon oþir wage [page 199]
But for to dwelle in eendelees woo;
Alas! whi haue y ben outrage,
And serued þe feend þat was þi foo?
Line 244
(26)
¶ But, lord, in hooli writt rede we,
Þat þou forsakist no wretchid wiȝt
Þat leueþ his synne & turneþ to þee;
And y to turne to þee have tiȝt.
Line 248
Full proud and rebel haue y bee;
But y wole meeke me in my siȝt;
From hens forward, y purpose me,
Aȝen myn ownë fleisch to fiȝt.
Line 252
(27)
¶ "My fleisch to feble, y wole faste;
Mi boonis to traueile y wole bende;
And þoruȝ þi grace, y am not agast,
What sorewe or sijknes to me þou sende,
Line 256
To suffre whilis my lijf may laste;
For vttirli to þis y wole entende,
To ponysche þat y haue trespast;
Mercy, ihesu! y wole amende."
Line 260
(28)
(Christ's Fourth Complaint.)
"MAn, y haue sente þee siluer and golde, [page 200]
And al þe welþe withinne þi woon,
To susteine þee and þin householde;
And with þe residue, manye oon
Line 264
Þou myȝtist han holpe, ȝong & oolde
Þat ben disesid and woo-bigoon;
My seruauntis suffren hungir & coolde,
Releef of þee ȝit haue þei noon.
Line 268
