(4)
"And xl yere in wyldurnesse,
with angels foodë I thè Feed;
Into the londe of grete Ryches,
to schewe thè love, there I thè led.
Line 28
to do thè more of kyndenes,
I toke þè kyndely, and nothyng dred,
I lefft my [[MS. my my]] myght, ant toke mekenes,
And my harte bloode for thè I bled.
Line 32
(5)
"Thy soule to save, this lyffe I led,
I bounde my selffe, þe to onbynde,
thus with my woo thy nedis I spede;
why art thowe to thy frende onkynde?
Line 36
for the in paradyse I ordeynnyd A plase;
full Rychë was thyn énfeftment;
howe myght þou me þus dispyse ony more,
than to breke my comaundement,
Line 40
(6)
"And to synne In vij Maner wyse,
and to myne Enemy so soone Assent?
he put the Downe, thowe myghttyst nat Ryse;
thy strenkythe, thy wytt, A-way is went!
Line 44
poore, naked, shamed, and shent,
that Frendeshype myghttest þou nat fynde,
But me that on the Roode was Rent;
why art þou to thy freende onkynde?
Line 48
(7)
"Man, I love the! whome Lovyst thowe?
I am þy frende; why wolt þou feyne?
I for-yave, and þu me slewe:
ho hath departyd oure lowe A tweyne?
Line 52
Turne to me! by-thenke the howe
thowe haste go mys! come home Agayne!
And thowe shalt be as welcome nowe
As he that synne neuer ded fayne.
Line 56
