(4)
¶ My faire love and my spousë bryght, [folio 42]
I saued hyr fro betyng / and she hath me bett;
I clothed hyr in grace / and heuenly lyght,
this blody surcote she hath on me sett;
Line 28
for langyng love, I will not lett,
swetë strokys be thes, loo;
I haf loued euer [[MS. ouer]] als I hett,
Quia amore langueo.
Line 32
(5)
¶ I crownyd hyr with blysse / and she me with thorne,
I led hyr to chambre / and she me to dye;
I browght hyr to worship / and she me to skorne,
I dyd hyr reuerence / and she me velanye.
Line 36
to love that loueth / is no maistrye,
hyr hate made neuer my love hyr foo;
ask than no moo questions whye,
but Quia amore langueo.
Line 40
(6)
¶ loke vnto myn handys, man!
thes gloues were geuen me / whan I hyr sowght;
they be nat white / but rede and wan,
embrodred with blode / my spouse them bowght;
Line 44
they wyll not of / I lefe them nowght,
I wowe hyr / with them / where euer she goo;
thes handes full frendly for hyr fowght,
Quia amore langueo.
Line 48
(7)
¶ Maruell not, man, / thof I sitt styll, [folio 42b]
my love hath shod me / wondyr strayte;
she boklyd my fete / as was hyr wyll
with sharp nailes / well thow maist waite!
Line 52
in my love was neuer dissaite,
for all my membres I haf opynd hyr to;
my body I made hyr hertys baite,
Quia amore langueo.
Line 56
