(8)
Dispyce me noȝt, swete lorde ihesu,
I am þe warke of þin aghen hende,
þof I hafe bene to þe vntrew;
Ihesu, þou kan me sone amende;
Line 60
þou has me made to þi lyknes,
thurgh synne I hafe loste heuenly mede;
Now, lorde, I aske of þi gudenes,
Ihesu, mercy for my myse dede!
Line 64
(9)
þow walde be borne for synful man,
for syn þou take no wreke on [folio 54] me.
. . . . .
. . . . . [no gap in MS.]
Line 68
My comforth be þi harde passione;
Ihesu, þer of hafe I gret nede;
For synne þou graunt me contrycione:
Ihesu, mercy for mysdede!
Line 72
(10)
After my dedes þou deme me noȝt;
after mercy þou do to me;
If þou me deme als I hafe wroght,
in bytter payns I drede to be.
Line 76
My lyfe to mende, & hafe mercy,
my lorde ihesu, þou be my spede,
luf þe, & drede, þat syttis on hy:
Ihesu, mercy for my myse dede!
Line 80
(11)
If I had done ilke cursed warke,
& alken synnes wer wroȝt in me,
þou may þaim sleke, als is a sparke
when it is put in myddes þe see;
Line 84
& þar may no man sleke my myse
bot þou, ihesu, of þi godhede;
when þou wouchesafe, þou sone forgyfese:
Ihesu, mercy for my mysdede!
Line 88
