Jhesu, Mercy for my Mysdede! A DEUOYT MEDITACIONE.
[Trin. Coll. Cambridge, B. 10, 12, leaf 53. Date of MS. about 1450.] [22 stanzas of eights, abab, cdcd.]
(1)
Ihesu, mercy! mercy, I cry:
myn vgly synnes þou me forgyfe.
þe werlde, my flesch, þe fende, felly
þai me besale both strange & styfe;
Line 4
I hafe ful oft to þaim consent,
& so to do it is gret drede;
I ask mercy with gud entent;
Ihesu, mercy for my mysdede!
Line 8
(2)
Þe werlde thurgh his fals couetyse,
þe fende with pryde, wreth, ire, envy,
I hafe, ihesu, bene fylde oft sythys,
my flesche with slewth & lychery,
Line 12
And oþere many ful gret synnes:
with repentance, ihesu, me fede,
for euere my tyme opon me rynnes:
Ihesu, mercy for my myse-dede!
Line 16
(3)
Turne not þi face, ihesu, fro me,
þof I be werst in my lyfynge;
I ask mekely mercy of þe,
for þi mercy passes al thynge.
Line 20
In þi fyue woundes þou sett my hert,
þat for mankynde on rode walde blede,
& for þi dede vgly & smert,
Ihesu, mercy for [my [Omitted in MS.] ] myse-dede!
Line 24
