LII.
¶ "Here I gif sir Gawayne, with gersone and golde,
Al þe Glamergane londe, with greues so grene;
Line 665
Þe worship of Wales, at wil and al wolde,
Withe Criffones Castelles, curnelled ful clene;
Eke Vlstur halle, to hafe and to holde,
Wayford and Waterforde in Wales, I wene;
Two baronrees in Bretayne, with burghes so bolde,
Line 670
Þat arne batailed abouȝte, and bigged ful bene.
I shal diȝte þe a Duke, and dubbe þe with honde,
Withe þi þou saȝtil with þe kniȝte,
Þat is so hardi and wiȝte,
And relese him his riȝte,
Line 675
And graunte him his londe."
LIII.
¶ "Here I gif sir Galerone," quod G[awayne], "with outen any gile,
Al þe londes and þe lithes, fro lauer to layre,
Connoke and carlele, Conyngham and Kile,
Yet if he of cheualry chalange ham [?] for aire;
Line 680
Þe loþer, þe lemmoke, þe loynak, þe lile,
Withe frethis and forestes, and fosses so faire;
Vnder your lordeship to lenge here a while,
And to þe rounde table to make repaire.
I shall refeff him in felde, in forestes so faire."
Line 685
